لندن: د بریتانیا حکومت د کډوالۍ او پناه غوښتنې د سیستم د اصلاح لپاره د نویو قوانینو او اقداماتو یوه پراخه بسته اعلان کړې چې هدف یې د ناقانونه کډوالۍ مخنیوی، د پناه غوښتنې د دوسیو چټکه ارزونه، د ناقانونه مېشتو کسانو ایستل او پر ټولنو او مالیه ورکوونکو د فشار کمول دي.
د حکومت له خوا پارلمان ته د ۲۰۲۶ کال د جون په ۳۰مه وړاندې شوی د کډوالۍ او پناه غوښتنې قانون د پناه غوښتنې په سیستم کې د وروستیو لسیزو تر ټولو لوی بدلون بلل شوی دی. حکومت وایي، دا اصلاحات به له هغو کسانو ملاتړ ته دوام ورکړي چې رښتیا هم نړیوالې ساتنې ته اړتیا لري، خو په ورته وخت کې به د ناقانونه او خطرناکو لارو د بریتانیا پر لور د سفرونو مخه هم ونیسي.
د ایستلو او قانون پلي کولو چټکتیا
د بریتانیا حکومت ویلي چې د قانون پلي کولو بهیر به نور هم پیاوړی کړي. د رسمي شمېرو له مخې، په تېرو ۲۱ میاشتو کې نږدې ۷۰ زره ناقانونه کډوال او بهرني مجرمان له بریتانیا ایستل شوي چې د مخکینۍ ورته مودې په پرتله ۴۱ سلنه زیاتوالی ښيي. په دغو کسانو کې شاوخوا ۱۰ زره بهرني مجرمان هم شامل دي.
د کورنیو چارو وزارت به د ۲۰۲۸-۲۰۲۹ مالي کال پورې د کډوالۍ د قانون پلي کولو بودجه دوه برابره کړي او د ۲۰۲۶-۲۰۲۷ کلونو تر پایه به د دې ادارې کاري ځواک د ۲۰۲۴ کال په پرتله ۶۰ سلنه زیات کړي. حکومت وایي، دا به د چاپو، نیونو او ایستلو عملیات په لسګونو زره مواردو کې زیات کړي.
د پناه غوښتنې پرېکړې به چټکې شي
حکومت وایي، اوس د پناه غوښتنې دوسیې د پخواني حکومت په پرتله څلور چنده چټک ارزول کېږي. د همدې له امله د لومړنیو پرېکړو په تمه د دوسیو شمېر د ۲۰۲۳ کال د جون له ۱۷۵ زرو څخه ۷۲ سلنه کم شوی او د تېر کال په پرتله ۵۵ سلنه راټیټ شوی دی.
د نویو اصلاحاتو له مخې، بالغ پناه غوښتونکي به نور د دایمي خونديتوب پر ځای لنډمهاله د کډوالۍ خوندیتوب ترلاسه کوي. د دوی د خونديتوب وضعیت به هر ۳۰ میاشتې وروسته بیا ارزول کېږي.
د پناه غوښتونکو هوټلونه تړل کېږي
د بریتانیا حکومت ویلي چې د پناه غوښتونکو لپاره به د هوټلونو پر ځای له لویو او ارزانه استوګنځایونو کار واخیستل شي.
د حکومت د پلان له مخې، ۲۰ نور هوټلونه به وتړل شي، وروسته له هغې چې د روان کال په اپرېل کې ۱۱ هوټلونه هم تړل شوي وو. حکومت وایي، د مخکیني حکومت پر مهال د دغو هوټلونو ورځنی لګښت مالیه ورکوونکو ته نږدې ۹ میلیونه پونډه تمامېده.
همدارنګه، حکومت غواړي د پخوانیو پوځي مرکزونو څخه هم د پناه غوښتونکو د استوګنې لپاره ګټه واخلي.
د ناقانونه کار پر وړاندې سخت اقدامات
د ۲۰۲۶ کال د اکتوبر له لومړۍ نېټې څخه به هغه کار ورکوونکي چې د خوراکي توکو د رسولو، ساختماني او نورو انعطاف منونکو کاري سکتورونو کې بې اسناده کسان په دندو ګوماري، له سختو قانوني اقداماتو سره مخ شي.
هغه کار ورکوونکي چې د کار قانوني حق نه ارزوي، له لاندې سزاوو سره به مخامخ شي:
– د هر ناقانونه کارکوونکي په بدل کې تر ۶۰ زره پونډو پورې جریمه؛
– د شرکت د مدیر د دندې د ترسره کولو منع؛
– او تر پنځو کلونو پورې د بند سزا.
حکومت وایي، دا اقدامات به د ناقانونه کار او ناقانونه کډوالۍ لپاره موجودې تشې وتړي.
د توقیف مرکزونو پراختیا
د بریتانیا حکومت د کډوالۍ د توقیف مرکزونو د پراختیا اعلان هم کړی دی.
د هاسلار (Haslar) او کیمپسفیلډ (Campsfield) د کډوالۍ د توقیف مرکزونو ظرفیت به له ۲۹۰ بسترونو څخه شاوخوا ۱۰۰۰ بسترونو ته لوړ شي، چې ورسره به د توقیف ټول ظرفیت ۴۰ سلنه زیات شي.
د حکومت په وینا، دا به په راتلونکو کلونو کې د زرګونو نورو ناقانونه کډوالو او رد شویو پناه غوښتونکو د ایستلو بهیر اسانه کړي.
د حکومت دریځ
د بریتانیا حکومت وایي، دا اصلاحات د “قاطع خو عادلانه” پالیسۍ برخه ده؛ یعنې له یوې خوا به د هغو کسانو ساتنه وشي چې رښتیا هم نړیوالې مرستې ته اړتیا لري، او له بلې خوا به د کډوالۍ سیستم منظم، عادلانه او دوامدار وساتل شي.
د حکومت په وینا، د دغو اصلاحاتو په مرسته به د پناه غوښتنې پرېکړې چټکې شي، د قانون پلي کول به پیاوړي شي، د ناقانونه کار مخه به ونیول شي او د استوګنې او استیناف په سیستم کې به هم بدلونونه راشي، څو پر ټولنو او مالیه ورکوونکو فشار کم شي.
